АҚШ президенті Байден Ресейден энергия импортына тыйым салатынын мәлімдеді

Фото: Егор Алеев / ТАСС

АҚШ Ресейден энергия импорттауға тыйым салды. Бұл туралы президент Джо Байден мәлімдеді, деп хабарлайды ТАСС.

Оның айтуынша, бұл ретте америкалық тарап Еуропадағы одақтастардың импортқа тыйым салуға қосыла алмайтынын түсінеді. Байден сондай-ақ Ресейге енгізілген шектеулерге байланысты елдегі бензин бағасының көтерілетінін ескертті.

АҚШ президентінің айтуынша, билік жеке секторды бағаны шарықтатпауға шақырып, алыпсатарлармен күресетін болады.

Байден сондай-ақ АҚШ-тың одақтастарымен бірге Украинаға қару-жарақ жеткізуді және гуманитарлық көмекті арттыруды жалғастырып жатқанын айтты. Ол Украина босқындарына қамқорлық жасау жауапкершілігін ел бөлісетінін атап өтті.

Бұдан бұрын хабарланғандай, АҚШ-та бензин бағасы бұрын-соңды болмаған рекордты еңсеріп, бір галлон үшін 4,17 долларға жетті. Бұл өсім Ресей мұнайының импортына алдағы тыйым салу туралы хабарларға байланысты болды.