Volvo электромобильдерге 1,1 миллиард доллар инвестициялайды
Фото: Густаво Граф / Reuters
Volvo Cars толық электромобильдер шығаруға дайындалу үшін алдағы бірнеше жылда Гетеборгтағы зауытына 10 миллиард крон (1,1 миллиард доллар) инвестициялайды, деп жазады Reuters.
Компанияның хабарлауынша, кәсіпорын жаңа технологиялар мен өндірістік процестерді енгізіп, аккумуляторларды құрастыруды ұйымдастырады. Volvo өзінің мақсатына қарай дәйекті түрде алға жылжуда — 2025 жылға қарай сатылған автомобильдердің 50 пайызы толығымен электрлік болуы керек, 2030 жылы — 100 пайызы. Осы мақсатта 2021 жылы Volvo мен аккумулятор өндіруші Northvolt Гетеборгта ғылыми-зерттеу және тәжірибелік-конструкторлық орталық құру және аккумулятор зауытын бірлесіп салу туралы хабарлады. Әлеуетті өндірістік қуаттылық 2026 жылы жылына 50 гигаватт-сағат деңгейінде жоспарланған. Жалпы инвестиция шамамен 30 миллиард швед кронын (3,3 миллиард доллар) құрайды.
Еуропалық автоөндірушілер ЕО-ның 2035 жылдан бастап ішкі жану қозғалтқышы бар жаңа көліктерді сатуға жоспарлаған тыйымына байланысты аккумуляторларға инвестиция салуды көздеп отыр. Сонымен қатар, еуропалық және американдық автогиганттар Тесламен бәсекелесуге ұмтылуда. Ең ірі автоөндірушілердің бірі General Motors электрлік пикаптар өндірісін арттыруға және жаңа аккумулятор зауытын салуға 6,6 миллиард доллар жұмсамақ. Компания Tesla-ны басып озып, 2025 жылға қарай жылына бір миллионға дейін электромобиль шығаруды жоспарлап отырғанын айтады.