«Известия»: Ресей пластикалық ыдыстарда 28 пайыздан жоғары алкогольді сату үшін айыппұл салғысы келеді

Фото: Unsplash

Ресей пластикалық ыдыстарда күшті алкогольді өндіруге және сатуға тыйым салуды жоспарлап отыр. «Известия» хабарлауынша, Мемлекеттік Дума тиісті заң жобасын 15 ақпанда бірінші оқылымда қабылдауы мүмкін.

Құжатқа сәйкес, пластикалық қаптамада құрамында 28 пайыздан астам этил спирті бар өнімдерді сатқаны үшін лауазымды тұлғаларға 100 мыңнан 200 мың рубльге дейін, ал заңды тұлғаларға 300 мыңнан 500 мың рубльге дейін айыппұл салынады. Ерекшелік 50 мл-ден аспайтын контейнерлер, сондай-ақ импорттық алкогольдік сусындар болады.

Парламентарийлер түсіндіргендей, мұндай өнім азаматтардың денсаулығына зиянын тигізіп қана қоймай, экологиялық проблемаларды да туғызады. Сонымен бірге, олар мұндай шаралар ішімдік құнының қымбаттауына әкелетінін ескертті.

2021 жылдың соңында Ресейде жан басына шаққандағы арақ тұтыну өсті. 2020 жылмен салыстырғанда бұл көрсеткіш екі пайызға өсіп, бір адамға бес литрге жеткен.