Мысыр билігі Украинадан 240 мың тонна бидай сатып алу келісімшартын бұзды.

Reuters агенттігі өз дереккөзіне сілтеме жасап, Мысыр билігі Украинадан 240 мың тонна бидай сатып алу келісімшартын бұзғанын хабарлады.

Екі жеткізуші компания Inerco және Nibulon келісім-шарттық міндеттемелерден босатылғаны көрсетілген. Келісімшарттар Египеттің тауарларды жеткізу жөніндегі бас дирекциясының бастамасымен тоқтатылды.

Басылымның мәліметінше, өткен жылдың желтоқсан айында Мысыр үкіметі астықты тоннасын 346 доллардан 360 долларға дейін сатып алған. Украинадағы қақтығыс салдарынан астық бірде-бір рет жеткізілмеді.

Бұған дейін Украинаның инфрақұрылым министрі Александр Кубраков пен Түркияның ұлттық қорғаныс министрі Хулуси Акар телефон арқылы Украина астығын Қара теңіз арқылы өткізуі тиіс кемені жөнелтуді бастау мәселелерін талқылаған болатын.